Dienst 25 okt. Muntjeziel

Inloop vanaf 10:30 uur 
Aanvangstijd: 11:00 uur 
voorbereid door de ouderenraad, 
Voorganger: Dhr. T. Ufkens
Oppas (Laura) en kindernevendienst (.....)
Koffie verzorgd door: Siete en Joke van der Wal
Organist: Saxofoonsectie Tida Kira

Meziek

Welkom & Regeldinkjes

De veurbereideng

De gemeente gijt stoan, noa t aansteken van de keers zingen we:

Openengslied Liedboek 216

1. Dag is begonnen as d' eerste mörgen,

liester het zongen het eerste laid.

Dank veur het zingen,

dank veur de mörgen,

t Woord geft ze beide hieltied vannijs.

2. Zaacht vaalt het zunlicht op eerste regen

as fiene drupkes op t nije gras.

Dank veur de geuren

uut grune tunen,

oorsprong en volheid aal woar Hij lopt.

3. Mien'nt is het zunlicht, mien'nt is de mörgen,

beide geboren ien t parredies.

Dank dus veur bliedschop,

dank elke mörgen,

dank God veur elke nij-schoapen dag.

Openengsgebed:

V.)

Alles wat goed is komt van Joe, God

doarom vroagen wij aan Joe: geef ons t ienzigt

wat of wij te doen hemmen en help ons dat te doen.

Loaten wij deur ons zörg veur tiedeleke zoaken

t eeuwege niet verliezen.

Deur Jezus Christus ons HEER.

A.)

Amen.

Zingen LB 287, 1 & 2

1       Rond et licht dat leven let,

groeten wij mekoar met vrede;

wel wiend veur of tegen het,

zegenriek mag toch elk weden, -

bij de Heer bennen wij thuus,

kiend aan huus.

2       Rond et boek van zien verbond

numen wij mekanders noamen,

roepen wij met haart en mond

levenswoorden: ja en oamen -

as de kerk van liefde leest,

is het feest.

Lezen: Lucas 15: 3-7

As één van jim honderd schoapen het woar één van kwiet wordt, dan let er toch die aander negenennegenteg ien t veld achter en gijt op zuuk noar die ene die kwiet is, net zo laang tot er hum vonden het? En as er hum vonden het, is er bliede en tilt hum op e scholders. As er thuuskommen is, roept er vrunden en buren bij nkander en zeit tegen heur: “Wees bliede met mij! Ik heb mien schoap weerom die vot waas!”

Ik zeg jim: zo zel der meer bliedschop ien e hemel weden over één zundoar die hum bekeert, as over negenennegenteg goeien die gien verlet om bekereng hemmen.

Zingen: De Heer is mien Hedder [noar Psaalm 23]

1       De Heer is mien Hedder!

k Heb aal wat ik wil

Hij geft mij geleide

en zörgt veur mien weide.

Hij brengt mij bij wotter,

dat kaalm is en stil.

2       De Heer is mien Hedder!

Van hum wacht ik t al;

Hij brengt mij op wegen

van bliedschop en zegen.

Hij steunt me as k uutglie,

Hij dragt me as k val.

4       De Heer is mien Herder!

Op heid’ en op zaand

zel Hij mij nog geven

genogt om te leven;

Hij wil mij verstaarken

met brood uut zien haand.

5       De Heer is mien Hedder!

k Blief stil aan zien zied,

en ik wil verkeren

ien t huus van mien Here:

Hij geft mij zien zegen,

Hij steunt mij altied.

Lezen Lucas 15; 11-24

Der waas es één, die twee zeunen har. De jongste zee tegen hum: “Voader, doe mij mien aarfdeel.” Toen verdeelde hij wat of er bezat onder heur.

n Dag of wat loater pakte de jongste zien zoaken bij nkander en trok noar n laand wied vot. Doar joeg hij alles der deur ien n roeg leven. Toen er alles opmoakt har, kwam der n zwoare hongersnood ien dat laand. Zulf kreeg er ok verlet. Toen ging er op stap en verhuurde hum aan één uut die streek. Die stuurde hum t laand ien om op de zwienen te pazzen. Hij wol groag zien moag vullen met t zwienevreten, mor gieneen die t hum gaf.

Toen bedocht er hum: hoeveul arbeiders van mien voader hemmen eten zat. Mor ik kom hier om haals van e honger. Ik wil noar mien voader goan en tegen hum zeggen: “Voader, ik heb zundegd tegen de hemel en tegen joe. Ik ben niet meer weerd dat ik n zeun van joe hiet. Nem mij aan as één van joen arbeiders.”

Hij ston op en ging noar zien voader.

Zien voader zag hum al van verrens aankomen; och, hij mos der tegen sloeken, hij vloog op hum òf en viel hum om e haals.De zeun zee tegen zien voader: “Voader, ik heb zundegd tegen de hemel en tegen joe. Ik ben niet meer weerd dat ik n zeun van joe hiet.”

Mor de voader zee tegen zien knechten: “Hoal gaauw t mooiste kleed en trek hum dat aan. Doe hum n ring om e vinger en sandoalen om e voeten. Hoal t mestkaalf en slacht dat. Laten we eten en feestvieren. Mien zeun hier waas dood en is weer leventeg worden! We warren hum kwiet en hij is weerom vonden!”

Toen begonnen ze met feestvieren.

Acclamatie LB 339g

Woorden van leven, een weg om te goan,

Jezus Messias.

Uutleg

Meziek

Zingen LB 608

1       Al t onlaand zel bluien,

al t onlaand zel laggen en jubeln.

De rotsen die stoan vanòf t begun van de wereld,

stoan vol wotter mor dicht,

de rotsen goan open.

Et wotter zel stromen

en t wotter zel fonkeln en stroalen

en aal wèl dörst het, komt drinken.

al t onlaand zel drinken,

al t onlaand zel bluien,

al t onlaand zel laggen en jubeln.

2       Verdrevenen keren

noar huus toe met goldgele schoven.

Zij die ien heur raauw

heur weg tot t uuterste gingen,

een veur een, en veurgoed,

zij keren ien koppels.

As beken vol wotter,

as beken vol schoemkoppend wotter

baanjernd omdèl van de baargen.

Met laggen en jubeln

die reren bij t zaaien

die keren mit laggen en jubeln.

3       Die dood is, zel leven

die dood is zel heuren: nou leven.

tot t leste aan toe

en onder stenen begroaven,

dode, dode, stoa op,

noar t licht van de mörgen.

Zien haand zel ons wenken,

zien stem zel ons roepen: Ik open

hemel en eerde en òfgrond.

En wij zellen heuren,

en wij zellen opstoan

en laggen en jubeln en leven.

Gebeden en goaven (collecte)

Zingen LB 1006 [t Onze Voader]

Onze Voader ien de hemel,

Doe stijst zörgzoam om ons toe.

Geef dat alle mensen wieten:

één is der mor, zo as stoe.

Loat ons hieltied weer geleuven

ien een wereld zunder pien,

ien dien riek wat ooit gijt kommen

en wat of we sums al zien.

Help ons soamen goed te leven

ja, te leven as dien kiend.

Geef ons elke dag te eten

tot de honger weer verdwient.

En vergeef ons wat wij fout doen,

krekt as wij niet blieven stoan

bij de fouten van een aander,

mor weer soamen verder goan.

Help ons om te zien wat goed is

en wat slecht is, of niet woar.

Geef dat wij et juuste kiezen:

Dat wij holden van mekoar.

Onze Voader wij geleuven

Ien dien wereld, ien dien tied.

Met dien licht helpstoe ons verder.

Hier en nou en domt. Altied.

Amen.

Amen.

Òfronden

Leste gebed & Zegen

Loaten we van hier goan, met mekoar, tot mekoar en de aander

om mens van God te weden.

Zegen ons de Eeuwege, want ien die noam maggen we nkander zegenen ien woorden vol liefde,

ien toal die zegent.

Goa van hier noar dien thuus, noar dien vrunden, noar die waark

en wees doar rejoal met dien Geleuf, dien Hoop en dien Liefde.

God die met ons is, zel ons doarbij helpen en zegenen:

Ien de noam van de Voader, de Zeun en de Heilege Geest.

Leste lied: LB 608

1       Goa met God want Hij is dicht bij dij,

dicht bij dij op al dien wegen

met zien road en troost en zegen.

Goa met God want Hij is dicht bij dij.

2       Goa met God want Hij is dicht bij dij,

zel met vleugels dij beschaarmen,

zel met zunlicht dij verwaarmen.

Goa met God want Hij is dicht bij dij.

3       Goa met God want Hij is dicht bij dij,

zel ien liefde dij bewoaren,

ien de dood dien leven spoaren.

Goa met God want Hij is dicht bij dij.

4       Goa met God want Hij is dicht bij dij,

totdat wij weer soamen bennen,

ien zien noam mekoar herkennen.

Goa met God want Hij is dicht bij dijn